کرکټ: پنجاب، ډیلي لوبډله په ۴ منډو له ماتې سره مخ کړه

دې لوبه کې ډیلي لوبډلې پچه وګټله او کینګز ایلیون پنجاب لوبډلې ته یې توپ وهنه ورکړه.

پنجاب لوبډلې ټاکلو شلو اورونو کې د ۸ لوبغاړو په سوزېدو سره خپلې سیالې ډیلي لوبډلې ته د ۱۴۴ منډو هدف ورکړ.

کارون نایر ۳۴ او ډیویډ میلر ۲۶ تر نورو لوبغاړو زیاتې منډې پکې وکړې.

د ډیلي لپاره پلنکیټ ۳ لوبغاړي وسوزول.

ډیلي لوبډله د هدف په ترلاسه کولو کې بریالۍ نه شوه، پوره شلو اورونو کې یې د ۸ لوبغاړو په سوزېدو سره یواځې ۱۳۹ منډې وکړې او د ۴ منډو په توپیر له ماتې سره مخ شوه.

توپ وهنه کې شریس ایر د ۵۷ منډو په جوړولو ترنورو ښه وځلېد.

د پنجاب لپاره توپ اچونه کې افغان ورو توپ اچونکي مجیب الرحمن خپلو ۴ اورونو کې د ۲۵ منډو په ورکولو سره دوه لوبغاړي وسوزول.

راجپوټ او انډیو ټای هم دوه دوه ویکټې ترلاسه کړې.

د لوبې غوره لوبغاړی راجپوټ وټاکل شو، چې د مجیب په نسبت یې خپلو اورونو کې دوه منډې کمې ورکړې وې.

روانو ای پي ایل سیالیو کې پنجاب لوبډلې له ۶ څخه د پنځه په ګټلو او یوې ماتې سره د جدول لومړی مقام ترلاسه کړ، خو ډیلي لوبډله له ۶ څخه په ۵ ماتو او یوې لوبې ګټلو سره د جدول ورستي مقام کې قرار لري.

د دې سیالیو په لړ کې به نن ماښام ۷ بجې د راشد اړوند سنریزر حیدآباد لوبډله د ممبي انډینز لوبډلې سره د سیالۍ ډګر ته ښکته شي.

نصرت الله عمرزی