د سوریې حکومت د ترکیې له ګواښوونو سره، سره عفرین ته پوځي ډلې استولي

د خلکو د ساتنې د کنډکونو یا «یپګ» په نوم کُردي ملېشو په یوې خبرپاڼې کې وویل، د سوریې حکومت عفرین ته پوځي ګروپونه استولي چې په وینا یې له ترکیې سره پر پوله به مورچلې ونیسي او د سوریې د ځمکنۍ بشپړتیا او سرحدونو په دفاع کې به برخه واخلي.

په عین حال کې د سوریې دولتي رسنیو ویلي چې ترکي ځواکونو په عفرین کې د سوریې پر حکومتي ځواکونو د توپونو ډزې کړي.

د ترکیې دولتي خبري اژانس اناتولي بیا ویلي، د سوریې حکومت پلوي ځواکونه وروسته له هغې چې ترکي ځواکونو د خبرداري په توګه د توپونو ډزې پرې وکړې له سیمې وتلي دي.

ترکي ځواکونه او د سوریې د حکومت هغه وسله‎وال مخالفین چې مشرتابه یې په انقره کې دی، له یوې میاشتې راهېسې په عفرین کې له کُردي ملېشو سره په جګړه بوخت دي.

ترکیې هوډ څرګند کړی چې د عفرین شمالي سیمه به له کُردي «وای. پي.جي» ملېشو چې دا هېواد یې ترهګره ډله ګڼي پاکوي او د سوریې حکومت پلوو ځواکونو ته یې خبرداری ورکړی چې د کُردي ملېشو ملاتړ دې نه کوي.

بهادر خان