Enikass Radio | انعکاس راډیو
شاعر: علم ګل سحر
زړه مې له تا څخه راټول کړم، تاته بیرته راشي
لکه پتنګ د رڼایي ځلا ته بیرته راشي
ارمان مې ستا تر آننګو ورسي، بیرته راشي
لکه افغان پرمختګ وکړي، شاته بیرته راشي
آزادي نه غواړي پخپله ځان بندي کړي راشي
د ځنځیرونو، زولنو شرنګا ته بیرته راشي
د یتیم سر باندې لاس تیر کړه، په تندي یې ښکل کړه
که دغه ګل له چا خپه شي، چاته بیرته راشي
ستا د وصال خیال وي سر زوری ماشوم هیڅ نه مني
چې نن یې و رټم خو بیا سبا ته بیرته راشي
ته دومره لیرې رانه ولاړې چې بیا هیڅ رانغلې
یاد دې له مانه شیبه ولاړ شي ماته بیرته راشي
