Enikass Radio | انعکاس راډیو
د امریکا د متحد ایالتونو ولسمشر ډونالډ ټرمپ پر ایران، روسیې او شمالي کوریا د نویو بندیزونو لایحه توشیح کړه خو ویې ویل چې دا لایحه ستونزمنه ده او له دې کبله نهشي کولی چې بشپړه یې پلي کړي.
اټکل کېده چې د دې لایحې تر توشیح وروسته باید د ایران پر سپاه پاسداران انقلاب اسلامي او هغو کسانو چې له دې ډلې سره اړیکې لري، بندیزونه ولګول شي خو تر اوسه په دې برخه کې جزئیات نهدي خپاره شوي.
همدا راز تمه وه چې پر هغو کسانو بندیز ولګول شي چې د ایران د توغندیو په پروګرام کې ونډه لري یا تجارتي راکړه ورکړه له دې پروګرام سره لري.
د بندیزونو ترڅنګ داسې ویل کېدل چې د ایران پر سپاه پاسدران ډلې به د وسلې د خرڅلاو مخه نیول کېږي.
پر شمالي کوریا هم د لېرې واټن د توغندیو د ازموینې لپاره بندیزونه لګول شوي دي.
پیونګ یانګ په وروستیو کې وویل چې د لېرې واټن توغندی یې ازمویلی دی چې د اټمي سروکي د انتقالولو توان لري او حتی د امریکا تر خاورې رسېږي.
پر درېیو هېوادونو د بندیزونو دا لایحه د جولای په میاشت کې د امریکا د استازیو جرګې او مشرانو جرګې اکثریت تائید کړه او ولسمشر ډونالډ ټرمپ د چهارشنبې په ورځ توشیح کړه.
ټرمپ د دې لایحې په اړه په یوه بیان کې ویلي دي چې د ده اداره به هغه څه ته لومړیتوب ورکړي چې کانګرس پاملرنه ورته کړې ده.
د متحد ایالتونو ولسمشر دا خبره هم کړې ده چې دا نوې لایحه یې د هېواد د ملي وحدت د لا ټینګېدا په هدف لاسلیک کړې ده.
ولسمشر ټرمپ هیله وښوده چې د نړۍ په لویو موضوعاتو کې د امریکا او روسیې ترمنځ همغږي رامنځته شي ترڅو بندیزونو ته اړتیا پیدا نهشي.
په ملګرو ملتونو کې د روسیې سفیر واسیلي نبنزیا “Vasily Nebenzya” نویو بندیزونو ته په اشارې وویل چې داسې هڅې د روسیې مخ له خپلې تګلارې نه شي اړولی.
پر مسکو د امریکا د پخواني ولسمشر بارک اوباما په وخت د دې لپاره بندیزونه ولګول شول چې روسیې د اوکراین کریمیا له خپلې خاورې سره یوځای کړه، پر اوکراین تور پورې شو چې د اوکراین په ختیځ کې یې له بیلتون غوښتونکو سره مرسته کړې او د امریکا د تېر کال د ولسمشرۍ په انتخاباتو کې یې د انټرنېټ له لارې مداخله کړې ده.
