د چمن دسیمه ایزو پوليسو په وينا چاودنه تر غرمې مخکې سپين بولدک ته څېرمه د چمن ښار په بازار کې د پوليسو يوه موټر ته نېژدې وشوه چې د يوه پوليس مشر او څلورو پوليس عسکرو په شمول يې ۱۵ تنه ټپيان کړل.
پوليس وايي، په ټپيانو کې د کلا عبدالله ضلعې د پوليسو ځايي مشر ساجدخان مومند هم شامل و چې د چاودنې هدف و او سمدستي له نورو ټپيانو سره د چمن ښار روغتون ته يووړل شو، خو د سختو ټپونو له امله يې ساه ورکړه.
چارواکي وايي، په چاودنه کې د ټپي شويو نورو دوو پوليسو په شمول د نورو څو تنو حالت هم مرګونى دى چې د درملنې لپاره کوټې ته راوړل کېږي او احتمال شته چې د مړيو شمېر زيات شي.
د چمن پوليس چارواکيو سمدستي له رسنيو سره په خبرو کې دا د ريموټ کنټرول چاودنه وبلله، خو وروسته يې وويل چې دا يو ځانوژونکى بريد و او د پېښې پرځاى يې د ځانوژونکي د بدن ټوټې موندلې دي.
دوی وايي، ځانوژونکى بريدګر په موټرسايکل سپور و، کله چې د پوليس مشر موټر ورته را ورسېد، نو ده ځان ته انفجار ورکړ.
د دې چاودنې مسؤليت تر اوسه کومې وسلهوالې ډلې نهدى منلى، خو په دې وروستيو کې چې پر پاکستاني امنيتي ځواکونو او پوليسو باندې کوم بريدونه شوي دي، مسؤليت يې اکثر جماعت الاحرار ډلې يا لښکرِجنګوي- العالمي ډلې پر غاړه اخيستى دى.
د پاکستان صدراعظم نوازشريف، د داخله چارو مرکزي وزير چوهدري نثارعلي خان او د بلوچستان د کورنيو چارو وزير سرفراز بګټي دا چاودنه په کلکه غندلې او د وژل شوي پوليس مشر له کورنۍ سره يې خواخوږي څرګنده کړې ده.