Enikass Radio | انعکاس راډیو
د مزانسي سوپر لیګ کرکټ سیالیو کې راشد خان د جوزي سټارس لوبډلې مقابل کې د خپلې لوبډلې لپاره ښه وځلېد، خو بیا یې هم لوبډلې لوبه وبایلله.
په دې لوبه کې د راشد اړوند دوربن هیټ لوبډلې جوزي سټارس لوبډلې ته د ټولو لوبغاړو په سوځېدو سره د ۱۲۹ منډو هدف ورکړ.
جوزي سټارس لوبډلې یاد هدف ۱۹،۴ اورونو کې د ۹ لوبغاړو په زیان سره پوره کړ او لوبه یې د یوې ویکټ او دوه توپونو په شتون کې وګټله.
که څه راشد خان ښه توپ اچونه وکړه، خو د نورو توپ اچونکو له خوا د زیاتو منډو ورکول هغه څه وه، چې دوی یې له ماتې سره مخ کړه او له مخکې تګه پاتې شول.
راشد په خپلو څلور اورونو کې د ۱۹ منډو په ورکولو سره درې ویکټې واخیستې.
په دې سیالیو کې ۶ لوبډلې یو د بل پر وړاندې لوبیږي، چې له جملې یې د راشد اړوند دوربن هیټ لوبډله د جدول په وروستي مقام کې ده.
دوی ۸ لوبې کړي، چې ۶ یې بایللي، یوه یې ګټلې او یوه یې بې پایلې پای ته رسېدلې ده.
دوربن هیټ لوبډله به ددې سیالیو په ۲۷مه لوبه کې سبا ماخستن ۶ بجې د لومړي مقام لرونکي کاپي ټاون بلیټز لوبډلې سره مخ شي.
خبریال : نصرت الله عمرزی
