Enikass Radio | انعکاس راډیو
شمالي کوریا ویلي دي چې د امریکا او سویلي کوریا لخوا د کوریا په نیمه ټاپو او شمال ختیځې اسیا کې ګډ عسکري تطبیقات سیمه د اټومي جګړې د فلاکت پر لورې بیايي.
شمالي کوریا خبرداری ورکړی دی چې د امریکا او سویلي کوریا لخوا ګډ عسکري تطبیقات په لوی لاس اټومي جګړو ته زمینه برابروي.
په ملګروملتونو سازمان کې د شمالي کوریا دایمي استازي جا سانګ نام د امنیت شورا ته په استولي لیک کې ویلي دي چې امریکا متحده ایالتونو د مارچ په لومړۍ نیته د سویلي کوریا سره په ګډه په پيل کړو عسکري تطبیقاتو کې په اټومي وسلو د سمبال کښتیو، تحت البحري کښتیو او د بمبارۍ د ځانګړو الوتکو نه استفاده کړې ده .
په لیک کې خبرداری ورکړ شوی دی چې د امریکا او سویلي کوریا دا ډول اقدامات په سیمه کې اټومي جګړې ته لار هواروي. امریکا او سویلي کوریا په روغ لاس سیمه د اټومي فلاکت پر لورې بیايي.
شمالي کوریا په لیک کې د امنیت شورا نه د امریکا او سویلي کوریا په ګډو عسکري تطبیقاتو د غور کولو غوښتنه کړې ده .
همداشان په لیک کې راغلي دي چې د امنیت شورا لخوا د شمالي کوریا ددې غوښتنې د ردولو سره به دا ښکاره کړي چې ملګري ملتونه او د امنیت شورا یواځې په یو سیاسي الې بدل شوي دي.
د بله پلوه تیره ورځ د شمالي کوریا لخوا په یو ځل د ۴ بالستیک توغندي ازمایلو د جاپان او امریکا سختې اندیښنې وپارولې.
امریکا او جاپان د ملګروملتونو د امنیت شورا بیړنۍ غونډې ته راوبلله.
د ملګروملتونو د امنیت شورا د شمالي کوریا لخوا د توغندیو ازمایل په کلکه توګه وغندل.
د یادولو وړ ده چې شمالي کوریا د ۲۰۰۶ کال راهیسې د اټومي فعالیتونو له امله د سخت نړۍوالو بندیزونو لاندې قرار لري.
