Enikass Radio | انعکاس راډیو
د دې هېواد اُتَر پَردېش ایالت کې د تابعیت نوي قانون پر ضد لاریونونو کې شپږ کسان وژل شوي او یو شمېر نور ټپیان شوي دي.
د نوي قانون له مخې له پاکستان، بنګله دېش او افغانستانه هند ته په غیر قانوني توګه تللو غیر مسلمان کډوالو ته د هند تابعیت حق ورکول کېږي، چې د دغه قانون پر ضد سخت لاریونونه راپورته شوي دي.
د هند په شمال اُتَر پَردېش ایالت کې د تابعیت نوي قانون پر ضد لاریونونه شوي، چې پر مهال یې لاریون کوونکو ته مرګ ـ ژوبله اوښتې.
ځایي پولیسو رسنیو ته ویلي، پَردېش ایالت کې د لاریونونو پر مهال تاوتریخوالی رامنځته شوی، چې له امله یې شپږ کسان وژل شوي او یو شمېر نور ټپیان شوي دي.
هند کې لاریونونه هغه مهال رامنځته شول، کله چې د هند پارلمان کې د ډیسمبر په ۱۲مه د تابعیت قانون ترمیمېدلو پر مهال له افغانستان، بنګله دېش او پاکستان څخه غیر مسلم نا قانونه کډوالو ته د هند د تابعیت ورکولو غوښتنه وشوه، خو مسلمانانو ته د تابیعت دغه غوښتنه پکې نه وه.
په دې لاریونونو کې د هند حکومت زرګونه کسان ونیول او ان له څلورو څخه د ډېرو کسانو یو ځای کې راټولېدو باندې یې هم بندیز ولګاوه.
لاریونونو د تابعیت نوي قانونو وروسته د ډهلي په شمول د هند په مختلفو ښارونو کې راپورته شول، چې پر مهال یې د پولیسو او لاریونوالو ترمنځ اخو ډب هم رامنځته شوی.
لاریونوال وایي، چې ولي مسلمانان په دې برخه کې له پامه غورځول شوي دي.
