Enikass Radio | انعکاس راډیو
د ای پي اېل سیالیو ۴۶مه لوبه چې د چینای سوپر کینګز او سنرایزر حیدرآباد لوبډلو ترمنځ تر سره شوه، لومړی توپ وهنه پکې حیدرآباد لوبډلې وکړه او ټاکلو شلو اورونو کې یې د څلور لوبغاړو په سوځېدو سره چینای لوبډلې ته د ۱۸۰ منډو هدف ورکړ.
توپ وهنه کې شکر دوان د ۷۹ او ویلیمسن د ۵۱ منډو په جوړولو سره ښه وځلېدل.
چینای لوبډلې یاد هدف د امباتي رایډو د ښې توپ وهنې په مرسته ۱۹ اورونو کې د دوه لوبغاړو په زیان سره پوره او لوبه یې د اتو ویکټو په شتون کې وګټله.
رایډو په ۶۲ توپونو د ۷ شپږیزو او ۷ څلوریزو په مرسته ۱۰۰ ناسوځېدلې او شاین واټسن ۵۷ منډې وکړې.
د حیدرآباد لپاره راشد خان تر نورو ښه توپ اچونه وکړه، که څه هم ویکټ یې وانه خیسته، خو په خپلو څلور اورونو کې یې ۲۵ کمې منډې ورکړې.
د دې سیالیو په ۴۷مه لوبه کې راجستان لوبډلې ممبۍ ته په ۷ ویکټو ماتې ورکړه.
لومړی توپ وهنه ممبۍ لوبدلې وکړه او شلو اورونو کې یې د ۶ لوبغاړو په سوځېدو سره راجستان ته د ۱۶۹ منډو هدف ورکړ.
راجستان لوبډلې د بټلر په چټکې توپ وهنې سره یاد هدف ۱۸ اورونو کې د ۳ لوبغاړو په زیان سره پوره کړ او لوبه یې د ۷ ویکټو په شتون کې وګټله.
بټلر په ۵۳ توپونو د ۵ شپږیزو او ۹ څلوریزو په مرسته ۹۴ ناسوځېدلې منډې وکړې.
د دې سیالیو په لړ کې به نن ماښام ۷ بجې د مجیب الرحمن اړوند کینګز ایلیون پنجاب لوبډله د آر سي بي لوبډلې سره د سیالۍ ډګر ته ووځي.
خبریال : نصرت الله عمرزی
